पेणःप्रतिनिधी
सेझ विरूध्द 24 गाव संयुक्त कृती समिती मार्फत गेल पाईपलाईन विरूध्द उपविभागीय अधिकारी कार्यालय पेण येथे शेतकर्‍यांकडून उपोषण करण्यात आले. मात्र शेतकर्‍यांच्या भावनांना पायदळी तुडवत अधिकारी वर्गांनी अक्षरश: शेतकर्‍यांचा अपमान केला आहे.
गेल वायू वाहिनीसाठी शेतकर्‍यांच्या शेत जमिनीतून शासन सक्तीने जागा संपादन करू पाहत आहे. मात्र शेतकर्‍यांनी या गेलच्या वायू पाईपलाईनला विरोध केला असून शेतकर्‍यांचे म्हणने आहे की सदरी पाईपलाईन ही खाडीच्या बाजूने न्यावी जेणे करून भविष्यात शेतकर्‍याला त्याचा दुष्परिणाम भोगावा लागणार नाही. परंतु गेल कंपनी प्रशासन आणि अधिकारी वर्ग ठस की मस व्हायला तयार नाहीत. कित्येक वेळी उपविभागीय कार्यालयात या बाबत बैठका झाल्या या बैठकींमध्ये अश्र्वासना पलिकडे शेतकर्‍यांच्या पदरी काहीच पडले नाही. आज प्रांत कार्यालय येथे शेतकर्‍यांनी एक दिवसाच्या उपोषणाची तयारी दर्शवत शेकडो शेतकरी उपोषणाला प्रांत कार्यालय येथे बसले आहेत. मात्र गेंडयाच्या कातडयाच्या अधिकारी वर्गांनी याकडे दुर्लक्ष करत बांधकाम मंत्र्यांचा स्वागत करण्यात धन्यता मानली. शेतकरी बिचारे उन्हात बसून सरकारचे प्रतिनिधी, अधिकारी वर्ग भेटण्यास येतील या भाबडया आशेवर बसले होते. मात्र दुपारचे तीन वाजले तरी अधिकारी वर्ग फिरकले देखील नाही. या उपोषण कर्त्यांमध्ये जि.प.सदस्य, सरपंच, सामाजिक कार्यकर्ते, यांच्यासह मोठया प्रमाणात शेतकरी हजर होते.
