उदयोजक सुरेशशेठ पाटील यांच्यावर सुनेचे गंभीर आरोप
पेण ः प्रतिनिधी
पेण येथील हॉटेल गोमांतकचे मालक उदयोजक सुर्यकांत उर्ङ्ग सुरेश जोमा पाटील यांच्याविरुध्द त्यांची सुन प्रज्ञा अमर पाटील हिने हॉटेल साई सहारा येथे नुकतीच पत्रकार परिषद घेउन सासरे सुरेश जोमा पाटील, नवरा अमर पाटील, दीर भरत पाटील, सासू लक्ष्मी पाटील यांच्याविरुध्द गंभीर आरोप करत सासरे सुरेशशेठ यांनी व्याजी पैसे लावण्यासाठी प्रज्ञाचे दागिने व रोख रक्कम 23 लाख रुपये एवढी घेतली असून, पैसे कमी पडत आहेत म्हणून प्रज्ञा हिचा सासरची मंडळी छळ करीत आहेत. याबाबत या अगोदर पेण पोलीस ठाण्यात गुन्हा दाखल झाला आहे. मात्र गुन्हा दाखल असताना देखील 26 मार्च 2025 रोजी प्रज्ञा हिला मारहाण झाली आहे. त्याबाबत 28 मार्च 2025 रोजी प्रज्ञा हिने पेण पोलीस ठाण्यात लेखी तक्रार केली आहे.
प्रसार माध्यमांशी बोलताना प्रज्ञा हिने सांगितले की, माझे लग्न 2013 ला झाले. तेव्हा पासून आजपर्यंत सासरच्या मंडळीने माझ्या घरच्या मंडळींना दागिने आणि पैश्यासाठी त्रास दिला आहे. मला लग्नामध्ये माझ्या माहेरहून 1 किलो सोनं दिल होतं. ते आणि आत्तापर्यंत 23 लाख रुपये एवढी रक्कम सासर्‍यांनी घेउन ते व्याजी लावले आहेत. तसेच वारंवार आणखी पैसे मी आणावे म्हणून मला शिवीगाळ करत आहेत. तसेच मारहाण ही करत आहेत. मी कौटुंबिक हिंसाचारा बाबत तक्रार केली आहे. परंतू त्यामध्ये माझ्या सासरच्या मंडळींना कोणतेही शासन झालेले नाही. त्यामुळे ते आजही मला त्रास देत आहेत. माझे सासरे हे 10 ते 12 टक्क्याने पैस व्याजी लावतात आणि हे व्याजी पैसे लावण्यासाठी पैसे कमी पडत आहेत म्हणून मला त्रास देत आहेत आणि माझ्या मुलांना देखील त्रास होत आहे मला न्याय हवा आहे. मला आणि माझ्या मुलांना जीवे मारण्याची धमकी दिली ही जात आहे. मी वेळोवेळी तक्रार करून देखील माझ्या तक्रारीचा पोलीस यंत्रण ही विचार करत नाही. माझे सासरे मला धमकी देतात पोलीस माझ्या खिश्यात आहेत, एस.पी माझे मित्र आहेत, तुला जायचं आहे तिकडे जा, तुला मी हुसकावूनच लावेन. तसेच सासर्‍यांनी रिव्हॉलवर ही लावल्याचे प्रज्ञा हिने प्रसार माध्यमांना सांगितले एकंदरीत व्याजी पैसे लावण्यासाठी सासरा आणि नवरा त्रास देत असल्याचे शेवटी प्रज्ञा हिने सांगितले.
याबाबत पेण पोलीस ठाण्याचे पोलीस निरीक्षक संदीप बागुल यांना विचारणा केली असता त्यांनी सांगितले की, प्रज्ञा हिची तक्रार 2 ऑगस्ट 2024 रोजी घेतली असून, त्याचे दोषारोप पत्र न्यायालयात दाखल झाले आहे. तसेच 26 मार्च 2025 रोजी काही प्रकार झाला त्याबाबत प्रज्ञा हिने 28 मार्च रोजी पेण पोलीस ठाण्यात लेखी तक्रार केली आहे त्याबाबत आम्ही चौकशी करत आहोत.
